‘വീട് വച്ചപ്പോൾ ആ 2 പേരാണ് കടം തന്നത്; ഞാൻ സിനിമ നിർമിക്കാത്തതിന് കാരണമുണ്ട്’: പിശുക്കല്ല, ഇതാ ജഗദീഷിന്റെ മണി മാനേജ്മെന്റ് തന്ത്രങ്ങൾ

∙ സ്വർണം ഉപകാരപ്പെട്ടു

സ്വർണം എനിക്കോ രമയ്ക്കോ ഒരു കാലത്തും ദൗർബല്യമല്ല. ഒരു സിംപിൾ ചെയിനും ഒരു വളയും ഒരു വാച്ചുമേ രമ ധരിച്ചിരുന്നുള്ളൂ. എന്നാൽ കുട്ടികളുടെ വിവാഹത്തിനു കാര്യമായി സ്വർണം കൊടുക്കണമെന്നു രമ നിർബന്ധം പിടിച്ചു. സ്വർണത്തിന് റിട്ടേണൊന്നും കിട്ടില്ല, ആ പണത്തിന് സ്ഥലം വാങ്ങാം എന്നതായിരുന്നു എന്റെ നിലപാട്. കൊമേഴ്സ് അധ്യാപകനും പ്രായോഗികബുദ്ധിയുള്ള ഒരു അമ്മയും തമ്മിലുള്ള വ്യത്യാസം ആയിരുന്നിരിക്കാം അത്. പിന്നീട് രമയുടെ ദീർഘവീക്ഷണം ശരിയായി. രണ്ടു മക്കൾക്കും വീടുവയ്ക്കാനും സ്ഥലം വാങ്ങാനും ഒക്കെ ആവശ്യം വന്നപ്പോൾ ആ സ്വർണം പണയംവച്ച് കാര്യം നേടാനായി. 

∙ ഓഹരി എനിക്കു പറ്റില്ല

എനിക്ക് ഇതുവരെ ഓഹരി നിക്ഷേപം ഇല്ല. അതു ശരിയെന്നോ തെറ്റെന്നോ പറയാൻ ഞാനില്ല. അതേക്കുറിച്ച് അറിയില്ല. അതു ചെയ്യാനുള്ള വൈദഗ്ധ്യം ഇല്ല. അത് എനിക്കു വഴങ്ങില്ല, അത്രതന്നെ. പക്ഷേ, അതിൽ നിക്ഷേപിക്കുന്നവരോട് വിയോജിപ്പില്ല.  നിക്ഷേപം റിയൽ എസ്റ്റേറ്റിൽ അത്യാവശ്യം ഭൂമിയുണ്ട്. രണ്ടു മക്കളുടെ പേരിലും ഭൂമി വാങ്ങിയിട്ടുണ്ട്. വാടകയിനത്തിൽ സ്ഥിര വരുമാനം ലഭിക്കും. ഏറ്റവും പുതിയ നിക്ഷേപവും സ്ഥലംതന്നെയാണ്. അവിടെ കെട്ടിടം നിർമിച്ച് വാടകയ്ക്കു കൊടുത്താൽ നല്ല  വരുമാനം കിട്ടും. മക്കൾക്കും ഭാവിയിൽ അതിലൂടെ നല്ല സ്ഥിരവരുമാനം ഉറപ്പാക്കാം.

ബിസിനസോ ലാഭമോ വേണ്ട ഈ പദ്ധതിയിലിട്ടാൽ പെട്ടെന്നു വലിയ ലാഭം കിട്ടും, ഓൺലൈൻ റമ്മി കളിച്ചാൽ ലക്ഷങ്ങൾ സമ്പാദിക്കാം എന്നെല്ലാം കേട്ടാൽ ചാടി വീഴുന്നവരുണ്ടാകാം. ലോട്ടറിയിൽ പരീക്ഷണം നടത്താം, അടിച്ചാലോ? എന്നും തോന്നാം. പക്ഷേ, അത് എനിക്കു വേണ്ട. ആ ചൂതാട്ട മനോഭാവം എനിക്കില്ല. അതിനെക്കാളും മനസ്സമാധാനം ജോലി ചെയ്തു ജീവിക്കുന്നതിലാണ്. കൂടെയുള്ള പലരും സിനിമ നിർമിച്ചു. എനിക്ക് അതിനു പറ്റില്ല. ഞാൻ ബിസിനസുകാരനല്ല. എനിക്ക് റിസ്ക് എടുക്കാൻ കഴിവില്ല. സിനിമ നിർമാണം നല്ല ലാഭമുള്ള ഏർപ്പാടാണ്, ഇറങ്ങിക്കൂടെ എന്നു ചോദിച്ചാൽ എനിക്ക് റെമ്യൂണറേഷൻ മതി, ലാഭം വേണ്ട എന്നാകും മറുപടി. എത്ര കോടി ലാഭം കിട്ടിയാലും എനിക്കു പ്രധാനം മനസ്സമാധാനമാണ്. ടെൻഷനില്ലാതെ ജീവിക്കാനാണ് ആഗ്രഹം.

∙ വായ്പയോടുള്ള നിലപാട്   

ആറു മക്കളെ പഠിപ്പിച്ച് നല്ല നിലയിൽ എത്തിച്ച എന്റെ അച്ഛൻ ഒരാവശ്യത്തിനും വായ്പ എടുത്തിട്ടില്ല. സഹോദരിമാരുടെ വിവാഹത്തിന് പിഎഫ് ലോൺ എടുത്തിരുന്നു. അതു പക്ഷേ അധ്വാനിച്ച് ഉണ്ടാക്കിയതിന്റെ നീക്കിയിരിപ്പാണല്ലോ? മക്കളുടെ വിവാഹത്തിന് രമയുടെ പിഎഫിൽ നിന്നാണ് പണം എടുത്തത്. ഇപ്പോൾ ഞാൻ വലിയൊരു തുക വായ്പ എടുത്ത് ഭൂമി വാങ്ങിയിട്ടുണ്ട്. അസറ്റ് വാങ്ങാനായി എടുത്ത ആ വായ്പയെക്കുറിച്ച്  ടെൻഷനില്ല. നാളെ സിനിമ ഇല്ലെങ്കിലും തിരിച്ചടയ്ക്കാം എന്നുറപ്പാക്കിയിട്ടുണ്ട്.  ആസ്തിയുണ്ടെങ്കിൽ പിന്നെ എന്തിന് വായ്പ എന്നു ചോദിക്കാം. ആവശ്യങ്ങൾക്കു വായ്പ എടുക്കാം. അതിൽ തെറ്റില്ല. പക്ഷേ, തിരിച്ചടയ്ക്കാനാവുന്ന തുകയേ എടുക്കാവൂ, വായ്പയുടെ പേരിൽ ആരും ശല്യം ചെയ്യരുത് എന്ന ചിന്ത വേണം.

∙ സിനിമ ഇല്ലെങ്കിൽ...

സിനിമയിൽനിന്ന് നാളെ വരുമാനം കിട്ടുമെന്നു പ്രതീക്ഷിച്ച് ഇന്നു നിക്ഷേപിക്കാൻ പേടിയാണ്. അധ്യാപകനായി റിട്ടയർ ചെയ്താൽ കിട്ടുന്നതിലും അധിക വരുമാനം, അത് സിനിമ ഇല്ലെങ്കിലും എനിക്ക് ഇപ്പോൾ കിട്ടും, കെട്ടിട വാടക ഇനത്തിൽ. മക്കൾ വളരെ നല്ല നിലയിലാണെങ്കിലും അവരോട് ചോദിക്കേണ്ടി വരില്ല. എന്റെ സമ്പാദ്യത്തിൽനിന്ന് അവർക്ക് മികച്ച സ്ഥിരവരുമാനം ഉറപ്പാക്കാൻ വേണ്ടത് ചെയ്തിട്ടുമുണ്ട്. അമ്മ സംഘടനയുടെ ഇൻഷുറൻസാണ് എനിക്കുള്ളത്.

∙ ഇത് എന്റെ അഭിപ്രായം, അനുഭവം  

ഞാൻ ഈ പറയുന്നത് മാത്രമാണ് ശരിയെന്ന നിലപാട് എനിക്കില്ല. ഒരാളെ ഉപദേശിക്കുന്നതിനോടു യോജിപ്പും ഇല്ല. ‘അത് എന്താ അങ്ങനെ, ഇതല്ലേ കറക്ട്’ എന്നു ചോദിക്കാം എന്റെ ജീവിതരീതി, അഭിപ്രായം ഇതാണ് എന്നു കരുതിയാൽ മതി. അധ്യാപകനായിരുന്നെങ്കിലും ഇന്നത്തെ സാഹചര്യത്തിൽ പല വിഷയങ്ങളിലും എന്റെ അറിവ് അത്ര ആഴത്തിലുള്ളതല്ല. എന്റെ മാത്രമല്ല, എല്ലാവരുടെയും അറിവ് പരിമിതമാണെന്നാണ് ഞാൻ വിശ്വസിക്കുന്നത്. അതിൽ ഏറ്റക്കുറച്ചിൽ വരാം. എനിക്ക് ക്ലെയിം ചെയ്യാനുള്ളത് സ്വന്തം അനുഭവങ്ങളാണ്. അതുതന്നെ ഇന്നസെന്റ്, നെടുമുടി വേണു എന്നിവരുടേതൊക്കെയായി താരതമ്യം ചെയ്താൽ തുലോം പരിമിതമാണ്

∙ അനിശ്ചിതത്വം മുന്നിൽ കാണണം

ഏതു മേഖലയിൽ പ്രവർത്തിക്കുന്നവരായാലും ഒരു അനിശ്ചിതത്വം എല്ലാവരും മുന്നിൽ കാണണം, പ്രത്യേകിച്ച് സിനിമാക്കാർ. ഈ മാസം നാലു പടം ഉണ്ടാകാം. അടുത്ത മാസം ഒന്നും ഇല്ലാതെ വരാം. ആർക്കും എപ്പോഴും എന്തുവേണമെങ്കിലും സംഭവിക്കാം. അത് എങ്ങനെ നേരിടും എന്ന ചിന്ത വേണം. ‘മാൻ പ്രപ്പോസസ് ഗോഡ് ഡിസ്പോസസ്’ എന്നല്ലേ. നാം എത്ര കണക്കുകൂട്ടിവച്ചാലും അതെല്ലാം തകിടം മറിയാം. അതിനാൽ കാൽക്കുലേഷൻ വേണ്ട. പക്ഷേ, വരുമാനം പെട്ടെന്ന് ഇല്ലാതായാൽ എന്തു ചെയ്യുമെന്ന ഒരു ചിന്ത ഉണ്ടാകണം. ബദൽ മാർഗം എന്തെന്നു ചിന്തിക്കുന്നത് നല്ലതാണ്. ജോലി സുരക്ഷ എന്നത് ഇപ്പോൾ സർക്കാർ ജീവനക്കാർക്കു മാത്രമാണ്. സൂക്ഷിച്ചാൽ ദുഃഖിക്കേണ്ട എന്നല്ലേ...

∙ എന്നും മുൻതൂക്കം പഠനത്തിന്   

വിദ്യാഭ്യാസത്തിനാണ് വിവാഹ കാര്യത്തിലും പ്രാധാന്യം കൊടുത്തത്. എംബിബിഎസ് എന്ന നാലക്ഷരത്തിന്റെ വില അറിയാമായിരുന്നു. മക്കൾക്കും ഏറ്റവും നല്ല വിദ്യാഭ്യാസം നൽകി, രണ്ടു പെൺമക്കളും ഡോക്ടർമാരാണ്.
(മനോരമ സമ്പാദ്യം മേയ് ലക്കത്തിൽ പ്രസിദ്ധീകരിച്ചത്.)